الخيانة؟.
الخيانة من ابشع الطرق اللي ممكن تؤذي بيها حد تاني ، نوعين من الخيانة ، إما تكون ليك حق الاعتراض ولو جاهرت بإن الشخص ده طعنك في ضهرك الكل هيقف في صفك أنها حاجة صعبة ، ونوع تاني انت ببساطة مش من حقك اساسا تعترض من وجهة نظر المجتمع ، " إتخان/ي وانت/ي ساكت/ة " !
واحدة جوزها خانها ، المجتمع هيغلطه نسبيًا ، وهيغلطها بردو أنها مش واخدة بالها من نفسها حتي لو بتتشقلب على الحيطة عشان تكفيه
واحدة خانت جوزها؟ انتو عارفين الباقي ..
من ناحية القانون في مصر بما إن لسة في بقايا من نصوص فرنسية عندنا ، فـ لو راجِل خان مراته ، ومراته فعليًا شافتهم على السرير بعيونها ، فاللاسف مفيش عقوبة للراجل الخاين!
حاجة كدة شبه الـ داري على بيتك يا حبيبتي ، والمثير للفخر إن اخيرا الستات بدأت ترفض ده ونسبة الطلاق كل ما بتزيد على اد م هي شيء مُحزن على الأطفال اللي بتتشتت ، على أد ما هي شيء مُبشر ومنذُر أن الناس بعد كدة هيدرسوا قرار الخِلفة كويس قبل م يجيبوا طفل يعاني نتيجة اختيار أمه/أبوه لشريك حياة خطء بدون م يكونله يد في السبب ولا العلاج!
وبالمناسبة ، سلب حق سجن الزوج أو معاقبته على خيانة زوجته ده ملهوش علاقة بالسَتر أو إن كلنا بشر وبنغلط فنعديله ، لإن الراجل لو هو اللي شاف مراته مع واحد في شقة فهو من حقه يبلغ بالواقعة وهتتسجن كمان !
يعني مطلعش القانون المصري طيب وعايز الناس تتوب في سكوت زي م بيقولوا؟ *بصوت الفنان خالد الصاوي*
القضية اتناقشت وهتتناقش لسة لحد م القانون يتغير ، لإن القانون بيتعامل مع الإنسان كإنسان بدون عنصرية لجنسه ، وأعتقد إن لو متحققش ده بيفقد عنصر كبير جدا من مصداقيته وثقتنا فيه ، حق الإنسان نتيجة إيذاء شخص له مبيتصنفش من ذكر لأنثى ، الفعل الواحد ، والمتضرر واحد ، والمعاناة واحدة عن الجنسين :")
ليست هناك تعليقات:
إرسال تعليق